Itsasaldeko sukaldaritzan aukera anitz bada: txipiroiak, bakailaoa, hegaluzea, sardinak, antxoak, legatza eta urraburuak, errate baterako.

Barnekaldera jin ezkero, aldiz, ez gara gibelean geratuko: bildotsean oinarritutako platerak ditugu (bildots arandoiak), eta baita ardi gazna edo ibaietako arrainak ere (amuarrainak, aingirak, izokinak). Bertzalde, hor da onddo eta perretxiko aukera zabala, ehiza ahantzi gabe, noski, basurdea, erbia, usoa eta basahuntza kasu Ipar Euskal Herrian plater ezagunenak hauek dituzue: tripotxak (bildots odolkiak), piperrada, euskal erara egindako oilaskoa, euskal pastela eta txingar garretan egindako usoak.

ERREZETAK

Hegaluze sabelaren terrina tomate, oliba berde eta piper gorri jelatinan

Osagaiak:

Zortzi lagunentzat:

• 800 gr atun sabel.
• 8 tomate heldu.
• 5 jelatina xafla.
• Tipula bat.
• 3 pipergorri.
• Antxoaz betetako pote 1/2 oliba.
• Olio-ozpinerako: Jerez-ko ozpina, oliba olioa, gatza eta piperrautsa.

Nola egin:

1. Tomate nahasketarako: tomateak zuritu, haziak kendu eta zati txikitan moztu. Tipula zuritu eta xerratan moztu, oliotan egin eta aurretik egindako tomatea gehitu. Ordu erdiz, su txikian utzi. Jelatina orriak bigunduarazi eta tomate-nahasketari erantsi. Guztia ondu.

2. Piperrak: Unetxo batez piperrak labe beroan eduki, eta ondoren azala kendu. Piperrak gatzatu eta egostaldia amaitutzat eman. Aparte gorde. Olibak: betetako olibak hustu.

4. Atuna: hegaluze sabela zentrimetro bateko xerratan moztu. Gatzatu eta pixka batean zartagian eduki, baina gehiegi egin gabe. Aparte gorde.

5. Terrinaren prestakuntza: portzelanako terrina errektangular bat sulfurizatutako paperez estali. Terrina bete arte banan bana elkargainka jartzen joan: tomateak, piperrak, olibak eta atuna. Egun batez gorde toki hotzean.

6. Aurkezpena: Olio-ozpina prestatu. Terrina estaltzen duen papera kendu, moldea atera eta xerra erregularretan moztu labanarekin. Plater erdian jarri, olio-ozpinez inguratu eta norbere gustura apaindu.

Bildots arandoiak piper eta perretxikoekin

Osagaiak:

Lau lagunentzat:

• 800 gr bildots arandoi.
• 800 gr ziza.
• 6 pikillo piper.
• 2 baratxuri ale.
• Perrexila.

Nola egin:

1. Perretxiko freskoak garbitu. Enborrak eta txapelak bereizi, txapel politenak gorde oso-osorik zerbitzatzeko.

2. Perretxiko enborrak zati txikitan moztu eta su txikian egin, txiki txiki egindako baratxuri ale eder bat gehitu xehetutako perrexilarekin. Sutik kendu eta apartean gorde. Ondoren, egindako nahasketa honekin lau pikillo piper bete behar dira.

3. Bildots arandoiak su geldoan egin, eta gatz-piperztatu. Arandoiak ondo gorritu arte utzi behar dira, baina beti ere samur-samur egon behar dute. Sutik kendu eta berotasunean utzi.

4. Perretxiko buruak xerra loditan moztu, eta zartaginan egin ondoren, gatza bota. Ondo txikitutako baratxuria gehitu eta dena egiten utzi. Sutik kendu eta berotasunean gorde.

5. Aurkezpena: piper xaflak gainean dituztela, bildots arandoiak platerean jarri, eta dena betetako piperrekin eta perretxiko buruekin lagundu. Nahi izanez gero, perretxiko saltsa pixka bat bota dakioke. Plater hau “Irulegi” ardo beltz botila batekin edota ardo gorriarekin lagun liteke.