Egin dezagun betiko plater eta produktuen zerrendatxoa: Ainhoako piperradak aipa ditzakegu, edota Ezpeletako antxoak. Hor dira, bestalde, Donibane Lohizuneko zezena, euskal erara egindako oilaskoa eta hegaluzea, Aturriko izokina, edota tripotxa bera (bildots odolkia).

Urdaitegiaren alorrean, berriz, piperrautsez lagundutako saltxitxak, hestebeteak, edota euskal erara egindako tripaki eta odolkiak datozkit gogora. Ezin aipamenik gabe utzi, noski, Itxasoko gerezi konfituraz lagundutako ahuntz gasna.

Hau guztia gutxi balitz, Lapurdiko sukaldaritzak garrantzi handia eman die beti azkenburuei. Otordu eder baten ondoren, ahosapaia gozo uzteko eta sabel aseezinak asetzeko, azkenburu aukera amaigabea dago. Baionako txokolatea, Itxasoko gerezizko euskal pastela, Donibane Lohizuneko makarroiak... gehiago eska al daiteke?

ERREZETAK

Izarra gutizia

Osagaiak:

Sei lagunentzat:

Almendra bizkotxoa egiteko:

• 4 arrautza
• 100 gramo azukre
• 125 gramo irin
• 80 gramo gurin
• 100 gramo almendra txiki-txiki eginda

Krema egiteko:

• 250 gramo esnegain freskoa
• 2 arrautza eta bi gorringo
• 150 gramo azukre
• 4 gelatina puska(8 gramo)
• 3 koilarakada Izarra likore

Saltsa egiteko:

• 500 gramo gerezi
• 150 gramo azukre

Nola egin:

1. Esnegaina harrotu chantillya egin arte eta hozkailuan sartu. Bizkotxoa egiteko, gurina urtu. Ontzi batean, Maria bainuan, gorringoak eta azukrea jarri eta irabiatu bolumena hirukoiztu arte. Ondo nahastu. Zuringoak irabiatu eta bi txandatan lehengo nahasketari gehitu. Orea ontzi erraktangular batean jarri eta 35 minutuz labean berotu (180 gradu). Ontzitik atera eta hozten utzi.

2. Krema egiteko, jelatina puskak ur hotzean busti. Gorringoak ontzi batean jarri, Maria bainu beroan. Azukrea gehitu, eta irabiatu nahasketa zuritzen hasi moussa bezain lodia izan arte. Sutik kendu. Astindu eta Izarra likore pixka bat bota. Ontzi txiki batean, jelatina poliki-poliki urtu bi koilarakada urarekin. Kremari bota, hotzean gorde, eta noizean behin irabiatu. Gorringoak irabiatu elur puntua hartu arte, lehengo kremari gehitu eta chantillya bota. Hozkailuan sartu. Gereziei hezurra kendu eta saltsa egin azukrearekin batera.

3. Lau bizkotxo puska moztu. Pusketak kartoi gogor banarekin inguratu, kremarekin bete eta bi orduz hozkailuan sartu. Platerean gerezi saltsa jarri eta gainean, pastela. Kakaoarekin hautseztatu. Gereziekin eta txokolaterekin apaindu.

Piperrada, Ainhoa erara

Osagaiak:

Lau lagunentzat:

• Baionako 4 urdaiazpiko xerra
• 800 gramo tomate fresko
• 200 gramo piper berde gozo
• 50 gramo tomate konzentratu
• 4 baratxuri
• 500 gramo tipula
• Urdaiazpiko zati bat
• 4 koilarakada olio
• Espezia sorta bat
• 8 arrautz
• 50 gramo gurina
• Gatza
• Azukrea
• Ezpeletako piperbeltza
• Txikitutako perexila
• Edalontzi bat ura
• Edalontzi bat Jurançon lehorra

Nola egin:

• Denbora: ordu erdi.

• Egostea: ordubete.

Tipula eta baratxuriak zuritu eta txikitu. Piperrei pipitak kendu eta lau zatitan moztu. Tomateak zuritu eta bitan ebaki, pipitak kendu eta zati handitan moztu. Eltze batean baratxuria egin, tipula gehitu eta utzi poliki-poliki egiten orduerdiz, espeziekin eta urdaiazpikoarekin. Zartagin batean piperrak egin, estalita, 15 minutuz. Piperrak, tipula eta baratxuriak nahastu. Txikitutako tomateak gehitu eta ondoren, tomate konzentratua, ura eta jurançona. Ordu erdiz egiten utzi. Espezia sorta eta urdaiazpikoa kendu. Gatza eta piperbeltza bota. Zartagi batean gurina urtu eta arrautzekin nahastu eta saltsa zati bat gehitu. Beste zartagin batean urdaiazpiko xerrak egin. Platerean jarri.