Donostia-Arraun Lagunak
Maila txukuna eman dezakeen Donostiako traineru bakarra Asier Lopez patroi duen Lugaņene da. Iaz Donostiako ordezkariak izan ziren Kontxan. Lehen ihardunaldi itxurosoa egin ondoren, bigarrenean motelago ibili ziren. Arraun-ena aurtengo talderik gazteenetakoa da. Iazko emaitzak hobetzearren, Koxtapetik bost arraunlari iritsi dira. Pasai Donibaneko traineruan titular postua ez bazuten ere, oso maila oneko gizonak dira. Lugaņenekoek oso prestakuntza ona egin dute aurtengoan. Euskal A Ligarako sailkapena lortu zuten eta denboraldi osoan zehar talde onenekin lehiatu dira.
Fortuna
Denboraldi zaila izan da honakoa Fortunarentzat. Baja ugari izan ziren denboraldi hasieran eta gutxieneko gizon kopuruarekin ekin diete estropadei. Manuel Rotelera da entrenatzaile berria, eta urtero bezala, beste traineru batzuek arraunlari onenak eraman eta gero, oso jende gaztearekin aritu behar izan dute. Fortunako arduradunek ėtrantsizio denboralditzatî hartu dute 1999koa.
Ur Kirolak
Urkik, Arraun Lagunak-ek bezala, oso lan ona egin ohi du beheko mailetan eta banku mugikorrean. Azken urteotan Donostiako bigarren untzia izatearekin nahikoa izan du estropadetan. Urkikoak Euskal B Ligan aritu dira urtean zehar. Esperientzia hartzeko denboraldia da. Prestakuntza aldetik, gogor saiatu dira entrenatzaile eta sendagile berriekin. Tostetan ere arraunlari gazteak eta beste kirol batzuetatik etorritako gizonak elkartu dituzte. Emaitza luze gabe ikusiko dugu.
(testu hau 1999ko irailean argitaratu zen)