1/
Estropadari aurpegi txarrik
guk ez daukagu jartzerik,
aurreko zarrak erakutsia
ez da komeni galtzerik.
Ederragorik itxas-gaiñean
bai ote dago sortzerik?
Agorrileko arraun-jairikan
guri ez dago kentzerik.

2/
Grazi berezi, aparteko bat
berekin gaurko egunak,
au badakigu bizi osoan
gozatu izan degunak.
Baliatu or anka ta esku,
gerri, beso ta belaunak,
zuen ordua iritxi da-ta
dantza, mutillak, arraunak!

3/
Edertasunez Donosti ere
arraun jaiaren antzeko,
beso-zabalka, aurpegi alaiz,
zai dago danok artzeko.
Jan-edanaren eskasirik ez
premi danak osatzeko,
beste toki bat nun olakua
eguna igarotzeko?

4/
Aurreko arrantzale on aiek
norgeiagokan asita,
arraun neurketa utzi ziguten
betirako itsatsita.
Nor alaitu ez oitura nola
gordetzen da ikusita?
Zarrak joan ziran emendik baiña
ondorengoak utzita.

5/
Atozte danok, trebe, bulartsu,
zeuen lana egitera,
Donostiari paregabeko
jaialdi bat ematera.
Etzait gogozko nabarmentzerik
aren da onen aldera,
geien diranak jaso bitzate
diruak eta bandera.