1/
Milla ta bederatzireunetan
berrogei ta laugarrena,
Kantauriako itxas-ertzetan
aztu ezin litekena;
betiko penaz geldi liteke
joaterikan etzuena,
sei ontzi bizkor leia bizian
bata bestean urrena;
gure begiak ikusi duten
arraun-jairik ederrena.

2/
Ain gazte jende sendo, zaildua
indartsu bezin liraña,
nolako txanpa beldurgarriak,
ura arraunketa bikaña!
Testigu ortxe gelditutzen da
Donostiko itxas-gaña,
urrezko letraz moldetu leizke,
merezi dute, alajaña!
bi Pasai, Ondarrabi, Orio,
Donosti eta Pedreña.

3/
Lendabiziko neurketa izan zan
Agorraren amarrean,
gure itxasoa etzan arkitzen
oso era azkarrean;
mugitzen zanik etzirudian,
baretasun ederrean;
ura jokoa ta estutasuna!
Danak elkarren urrean!
Bein bear eta oriotarrak
beste guztien aurrean.

4/
Bizkor asi ta bizkor bukatu,
an etzan iñor makaldu,
joko guztitan gertatzen dana:
norbaitek behar zun galdu;
ta bakoitzari berea eman,
zertako temari eldu?
Langille onak bere soldata
irabazia ez al du?
Guziak onak izanagatik
batek onena bear du.

5/
Arraunlariak jokatu ziran
asmo zuzenez beterik,
aien burutan etzegon ezer
al zana egin besterik;
askok diote an ez ote zan
amairu seundon alderik,
maiko juezak nastu litezke,
ortan ez dago dudarik,
ala izan arren mutil on aiek
bai al zeukaten kulparik?

6/
Uretan garbi erabaki zan
ontzi arteko burruka,
gero etzegon kalerik kale
zertan ibili muturka;
ainbat eta ainbat nabaitu giñun
karraxika eta ujuka,
urte ontako txapeldunari
fuera¥ka eta txistuka,
gauz ori ontzat artzen duanak
gizatasunik eztauka.

7/
Galdu-irabazi, lagun bear du
alkarri esku emanda,
gure aurreko guraso zarrak
ala gelditzen ziran da;
itxusi baitzan ainbat naspilla
Donostiraño juanda,
nik beitzat asko sufritu nuan
begira egon nintzan da,
alkar jan naian ala ibiltzea
danok anaiak izanda!

8/
Gora San Juan! Gora Ondarrabi!
Biotz on hoiek alaitu!
Egin dezuten lan eder orrek
guziok poztu baigaitu.
Gora Pedreña! Gora Donosti!
Aurrera gogoz jarraitu,
ta San Pedrotar bikain trebeak
aurten bigarren gelditu,
aita Manuel jator leialak
ondorengoak baditu.

9/
Oriotarren birtute ori
arrigarri ez ote da?
Obrari begiratu zaiogun,
itzak laga alde batera;
errespeto onez txapela erantzi
gizonak baldin bagera,
txarrak izanda eztira ekartzen
nolanai erri aldera,
lau medallekin, amabi kopa
eta ogeitamar bandera.