1/
Kantari natorkizu
Donostia zuri
itsas lurren mugatik
ametsera zubi.
Arnasan ere zaizu
kresala isuri
zu uzten zaituenak
beharko itzuli.

2/
Harrotzeko arrazoi
badu anitz herrik,
non ordea lurrean
hain hiri ederrik.
Ederragoren baten
bazaude beharrik
Donostitik inora
ez joan alferrik.

3/
Urgul eta Igeldo
goitik begirale
irla, kaia ta Kontxa
esnatzen dirade.
Hondarzale naiz eta
apar zuri gale
arima itotzen zait
usain hori gabe.

4/
Agur eta goraintzi
Parte Zahar horri
jatorriz zahar bezain
jendez beti berri.
Hitzetik zurrutera
ibil edo korri
mundua nahi duena
bertara etorri.

5/
Donostin Bulebarra
hori duk karrika,
batzuk korrika eta
besteak harrika.
Egunez dinbi-danba
gauez errepika
bizkar onean dugu
larrua jarrita.

6/
Gaitz batek zikintzen du
Donostiko jira
Urumea ibaira
egon naiz begira.
Ur horiek garbitzen
ez baldin badira
berriz bota beharko
ditugu mendira.

7/
Donostiko Realak
merezi du aipu
galtzea ere zer den
ia ahaztu baitu.
Onena izan eta
bigarren amaitu
Madrilek hortan ere
izorratzen gaitu.

8/
Madrilen da dirua
eta zementua
Donostian indarra
eta talentua.
Iazkoa izan zen
entrenamentua
aurten zer izango den
atera kontua.

9/
Zer lanaren luzea
hazitik uztara!
Donostian loratzen
omen da euskara.
Egia eder hori
gezurra ezpada
Jantzi musikaz eta
zatozte festara.

10/
Agur Donostiako
argi ta itzala
Kantauriko urdinak
kontserba zaitzala.
Zuri bertso berririk
ontzea gaitza da
bertsorik ederrena
zerori baitzara.