Donostian urtero antolatu ohi den Zinemaldiaren hizkuntz erabilera neurtzea erabaki du BAGERA Donostiako Euskaltzaleen Elkarteak, aurreko urteetan egindako azterketari jarraipena eman asmoz. Nazioarteko Zinemaldiak, besteak beste, Euskal Autonomia Erkidegoko, Gipuzkoako Foru Aldundiko eta Donostiako Udaletxeko dirulaguntza jasotzen du eta gure baitan izan behar dugu euskara hizkuntza ofiziala dela EAEn, eta Donostiako Udal Ordenantzek euskarak, gutxienez, gazteleraren trataera berdina izan behar duela diotela.

Urteroko behaketa hauekin, euskarari eskaini zaion trataerak aldaketarik jasan duen eta, orokorrean, eskaini zaion presentzia zer nolakoa izan den jakitera eman nahi dugu. Emaitzen baitan, honako azterketa hauek baliagarriak zaizkigu nolako proposamenak egin daitezkeen eta zein planteamendurekin jakin ahal izateko.